Liga sa Carmen sugdan na

CEBU, Philippines — Ang gikahinaman nga "Liga sa Carmen" pormal nga sugdan karong adlawa didto sa Carmen gym sa amihanang bahin sa Sugbo.

Duha ka mga duwa ang gitakda karon, apan masayran ang iskeyul pinaagi sa 'bunot-bunot' human sa programa nga sugdan sa alas-6 sa gabii.

Napulo ka teams ang magtigi ug kini mao ang D'Bombers, Mt. Carmel, Crusaders, Pirates, Buyo Basketball, Fighters, Baring, Pier, Cebu Safari ug ang Spartans.

Moduwa sila ubos sa single round robin format sa elimination. Ang top 2 teams awtomatik nga moabante sa semifinals. Ang No. 3 ug No. 4 armado og 'twice-to-beat' incentives batok sa No. 6 ug No. 5 sa quarterfinals. Ang mga modaog maoy makaangkon sa katapusang duha ka luna sa semifinals nga ipaagi sa round robin. Ang top 2 teams sa semis maoy mag-abot sa 'best-of-three' finals series ning maong liga nga gipasiugdahan sa Thirdy's Jersey ug sa SK Federation ubos sa liderato ni Jether Lacno.