7 Filipino athletes lalahok sa Singapore Sports Camp
MANILA, Philippines — Pitong Pinoy athletes ang lumipad kahapon patungong Singapore upang maging kinatawan ng Pilipinas sa 2019 STEP Asian Youth Sports Leaders Camp na tatakbo hanggang Marso 17.
Pinangunahan ni Southeast Asian Games boxing champion Eumir Felix Marcial ang delegasyon ng bansa kasama sina Islay Erika Bomogao ng muay, Abigail Sinogbuhan ng sepak takraw, Jack Danielle Animan ng basketball, Jamaila Ramos ng pencak silat at Horner De Vera ng bridge.
Inorganisa ang camp ng Singapore Olympic Foundation, Sports Singapore at Temasek Foundation International.
Makakasama ng pitong Pinoy delegates ang mahigit 100 atleta mula sa iba’t ibang bahagi ng Asya kung saan sasailalim ang mga ito sa iba’t ibang aktibidad gaya ng leadership training at values inculcation para makabuo ng magandang samahan ang Asian youth leaders.
Kasama rin sa Singapore si Philippine Olympic Committee secretariat Katrina Gargoles na siyang delegation head.
Nilinaw ng POC na walang ginastos na pondo ang gobyerno dahil sagot ng Organizing Committee ang lahat ng gastusin sa naturang camp.
- Latest
