PSTC malaking tulong sa mga atleta

MANILA, Philippines — Malaki ang maitutulong ng pagkakaroon ng modernong sports trai­ning center para sa hinahangad na kauna-unahang gold me­dal ng Pilipinas sa Olympic Games.

Pinasalamatan kahapon ni 1Pacman party-list Rep. Mikee Romero si Pangulong Rodrigo Duterte sa paglagda sa Republic Act 11214 o ang “Philippine Sports Training Center Act”.

“It’s a dream come for our national athletes because in two years time they will have a modern sports facility that is at par with some of the best in the world,” wika ni Romero. “Certainly, this is one of the landmark sports projects under the administration of President Duterte.”

Pondong P3.5 bilyon ang inilaan ng pamahalaan para sa pagpapatayo ng Philippine Sports Training Center (PSTC) sa isang 20-hectare sports hub sa Rosales, Pangasinan sa taong 2022.

Ang PSTC ay magagamit ng mga atleta ng archery, athletics, badminton, baseball, basketball, beach volleyball, bowling, taekwondo, karate, judo, wrestling, cycling (velodrome), dance sport, football, gymnastics, handball, lawn tennis, sepak takraw, shooting, softball, squash, swimming, table tennis, volleyball, wall climbing water polo at weightlifting.

Bagama’t maliit ang P3.5 bilyon kumpara sa mga ginagastos ng mga ka­pitbahay sa Southeast Asia sa pagpapatayo ng kanilang mga sports training centers, naniniwala naman si Romero na mangingibabaw ang determinasyon ng mga Filipino athletes sa mga lalahukang kompetisyon.