Coaches training sa Gov's Cup gitakda
CEBU, Philippines – Ang Cebu Provincial Sports Commission (CPSC) mopahigayon na sab og coaches training sa tanang mga entranteng koponan sa 2019 Cebu Governor's Cup Inter-Cities and Municipalities Under 21 Developmental Basketball Tourbnament karong Pebrero 18-20 didto sa Sisters of Mary School-Boystown sa Tungkop, Minglanilla.
Si CPSC Executive Director Atty. Ramil P. Abing nagkanayon nga kabahin kini sa naandan nilang programa alang sa nagkadaiyang mga LGUs (local government units) nga miapil sa ilang torneyo, kansang laraw mao ang pagbaid sa abilidad sa potensiyal nga mga magduduwa ug ingon man pagdiskubre og mga bag-ong talento dinhi sa Sugbo.
"Through this training of coaches, we desire to improve their knowledge in coaching so they can impart it to the players and the players can learn something from the tournament," matud pa ni Abing.
Ang tulo ka adlaw nga kalihukan pasiugdahan ni basketball legend Pido Jarencio, ang kasamtangang head coach sa NorthPort Batang Pier sa PBA.
Duha ka higayon nga nasakop sa All-Star ug duha sab ka higayon nga na-PBA champion, si Jarencio usa sab sa mga utok nga nagtukod sa Community Basketball Association (CBA), ang labing bag-ong rehiyonal nga liga sa nasud.
Gisalmotan og 41 ka mga LGUs nga gi-bracket matag distrito, ang 3rd Governor's Cup gikatakda nga mosikad karong Marso 9. Ang Talisay Aquastars maoy defending champions.
- Latest
