Batang Pier sososyo sa liderato
Laro Ngayon(Ynares Center, Antipolo City)
4:30 p.m. Columbian vs NorthPort
7 p.m. Meralco vs SMB
MANILA, Philippines — Hangad ng NorthPort ang kanilang ikatlong sunod na pananalasa para makasosyo sa liderato habang ang pangalawang dikit na panalo ang kapwa target ng four-time champions San Miguel at Meralco.
Magtutuos ang Batang Pier at Columbian Dyip ngayong alas-4:30 ng hapon at sasagupain ng Beermen ang Bolts sa alas-7 ng gabi sa 2019 PBA Philippine Cup sa Ynares Center sa Antipolo City.
Itinala ng NorthPort ni coach Pido Jarencio ang kanilang ikalawang dikit na arangkada matapos talunin ang Blackwater Elite, 95-90 tampok ang 22 points, 9 rebounds at 5 assists ni Sean Anthony.
Nabigo naman ang Columbian ni mentor Johnedel Cardel na maiposte ang 2-0 panimula matapos yumukod sa Phoenix, 98-108 kung saan nalimitahan si No. 1 overall pick CJ Perez sa 10 points matapos humataw ng 26 markers sa kanilang 124-118 paggitla sa San Miguel.
“We’re not that strong yet. If we play together malakas kami. If not, wala kaming chance manalo,” wika ni Cardel sa kanyang Dyip na muling aasahan sina Perez, Rashwan McCarthy, Jackson Corpuz at Eric Camson.
Sina Anthony, Stanley Pringle, Moala Tautuaa at No. 3 overall selection Robert Bolick ang itatapat naman ng Batang Pier.
- Latest
