Lions kumakaway sa bonus; Altas wagi rin

Laro Ngayon (The Arena)

12 nn.  EAC vs MU (Srs)

2 p.m.  JRU vs AU (Srs)

4 p.m.  CSJL vs LPU (Srs)

MANILA, Philippines — Mabangis ang nagdedepensang San Beda University nang sakmalin nito ang College of Saint Benilde, 77-55 upang makalapit sa Final Four twice-to-beat advantage sa NCAA Season 94 men’s basketball tournament kahapon sa The Arena sa San Juan City.

Mainit na naman ang palad ni Robert Bolick nang kumana ito ng 19 puntos, apat na assists at tatlong rebounds para sa Red Lions na umangat sa 14-1 rekord para saluhan ang Lyceum of the Philippines (14-1) sa unahan ng standings.

Nagsumite naman si Javee Mocon ng 13 mar­kers habang may double-double na 13 points at 10 boards si Donald Tankoua, at pinagsamang 18 puntos sina Calvin Oftana at Ac Soberano.

Tanging si Clement Leutcheu lamang ang nagtala ng double figures para sa Blazers tangan ang 12 puntos samantalang may tig-siyam lamang sina Justin Gutang at Rob Nayve.

Bumagsak sa 8-7 marka ang Benilde para manganib ang tsansa nito sa Final Four.

Sa unang laro, hindi alintana ng University of Perpetual Help System Dalta ang nakaambang forfeiture sa kanilang pinaghirapan sa eliminasyon nang itakas nito ang 85-77 overtime win laban sa San Sebastian College-Recoletos.

Mas determinado si Ca­meroonian Prince Eze nang humataw ito ng 25 puntos, 23 rebounds at apat na blocks para buhatin ang Altas sa 10-5 baraha at mapatatag ang kapit sa No. 4 spot.

“Malakas yung San Sebastian, they have the materials to win games. We were just lucky to come back from five points down in the last minute. Sometimes it’s better to be lucky than to be good,” ani Altas mentor Frankie Lim.

Kumana naman si Jeffrey Coronel ng 15 markers habang nagsumite sina Jielo Razon ng 13 at Edgar Charcos ng 12 para sa Perpetual Help.

Walong manlalaro lamang ng Altas ang naglaro.

Gumulong ang San Sebastian sa 4-11 baraha.