Phelps bumida uli sa fuel masters

Hotshots inilaglag

MANILA, Philippines — Isa na naman itong ordinaryong araw para kay import Eugene Phelps.

Humakot si Phelps ng 36 points, 20 rebounds at 4 blocks para pangunahan ang Phoenix sa 95-82 panalo laban sa Magnolia at solohin ang ikalawang puwesto sa 2018 PBA Governor’s Cup kahapon sa Smart Araneta Coliseum.

Ito ang pangatlong su­­nod na arangkada ng koponan ni head coach Louie Alas.

Diniskaril ng Fuel Masters ang pagtatayo ng Hotshots ng 3-0 record para sa kanilang 5-1 kartada sa ilalim ng nangungunang Blackwater Elite (4-0) kasunod ang nagdedepensang Ginebra Gin Kings (3-1) at Alaska Aces (3-1).

“We were able to put a clamp on their offensive guys especially in the third quarter,” wika ni Alas.

Nagdagdag si Matthew Wright ng 13 markers kasunod ang 12 ni Justin Chua at tig-9 nina Calvin Abueva, LA Revilla at RJ Jazul, ayon sa pagkakasunod.

Matapos isara ang third period bitbit ang four-point lead, 71-67 ay isang 11-5 atake ang inilunsad ng Phoenix para iposte ang 10-point advantage, 82-72 laban sa Magnolia mula sa split ni Abueva sa 5:33 minuto ng fourth quarter.

Ang follow-up ni rookie Jason Perkins sa natitirang 40.2 segundo ang nagbigay sa Fuel Masters ng komportableng 93-80 kalamangan para selyuhan ang kanilang panalo sa Magnolia.

Binanderahan ni import Romeo Travis ang Hotshots mula sa kanyang 28 points at 15 boards kasunod ang tig-11 markers nina Ian Sangalang, Mark Barroca at Jio Jalalon.

Bago ito ay dinomina ng Phoenix ang first quarter, 30-19 hanggang makatabla ang Magnolia sa halftime, 48-48.

Huling naglaro ang Hotshots noong Setyembre 1 kung saan nila dinaig ang NorthPort Batang Pier, 104-87 para sa kanilang ikalawang sunod na panalo.