VHA midaog na gyud
CEBU, Philippines — Nakatilaw na gyud og daog ang VHA sa upat nila ka duwa dihang ilang gibihag ang Victorious Eagle, 76-71 sa J&J Surplus Ballclub Season 13 Above 30 basketball tournament niadtong Huwebes didto sa GT Academy gym sa Tayud, Lilo-an.
Dili hinuon sayon ang nakab-ot nila nga kadaogan kay sila ang pirmeng naggukod sa halos tibuok duwa. Diha na sila nakarekober sa fourth quarter.
Lima lang ka players ang nakaiskor alang sa VHA ni Jojo Satuita, apan nakahimo gihapon sila sa pagdaog. Gipangulohan kini ni Michael Gandionco nga mipabuhagay og 27 puntos, gisundan ni Jebb Layese nga miamot og 17 puntos.
Tulo sab ka Victorious Eagle players ang miiskor og double figures ubos sa pagpangulo ni RJ Jalang nga mikabkab og 15 puntos.
Ang team manager nga si Danrex Bayonla mipakita sab og maayong salida diin mikadlit kini og 11 puntos, samtang si Ralph Lascuña miambit og 10 puntos.
Ang VHA aduna na'y 1-3 win-loss record, samtang ang Victorious Eagle nagtangag og 2-2 nga baraha.
Sa laing aksiyon, gilubong sa Villa Reyna subdivision ang Pilapilan, 80-68 alang sa ilang 2-2 record.
Si Paul Abenasa miburak og 23 puntos aron pangulohan ang Villa Reyna ni Joel Camillo. Sila si Paul Desamparado ug Dante Arnosa nagkumboya'g 34 puntos sa Villa Reyna nga nagbitbit na karon og 2-2 nga baraha.
Ang 2-3 nga Pilapilan gipangulohan ni Sayrel Cabayo nga mikabya og 17 puntos, gisundan ni Reynan Pepito sa iyang 10 puntos.
Ang liga nga ubos sa pagtugot sa presidente niining si Henry Agbon, gipadagan ni commissioner Fury Trazona sa abag nilang Chang Tejero, Marcos Bardon, Harris Perez ug Choy Pilapil.
PUNTOS MATAG USA
Unang duwa:
VILLA REYNA (80) – Abenasa 23, Desamparado 19, Arnosa 15, Yurag 8, Radoc 6, Nelmida 5, Tradio 1.
PILAPILAN (68) – Cabayo 17, Pepito 10, Cortez 8, Cortez 6, Dayuja 6, Nulla 6, Orque 5, Caparroso 4, Caparroso 3, Bihag 3.
Ikaduhang duwa:
VHA (76) – Gandionco 27, Layese 17, Ardiente 16, Lecciones 8, Berdin 3.
VICTORIOUS (71) – Jalang 15, Bayonla 11, Lascuña 10, Patalot 7, Molo 7, Lascuña 6, Jalang 4, Royske 4, Cobong 4, Calipes 2.
- Latest
