Depensa ni Ancajas kasado na sa Sept. 14

MANILA, Philippines — Kumpirmado nang gagawin ni Filipino boxing sensation Jerwin Ancajas ang kanyang pang-limang pagdedepensa sa suot na world super flyweight crown sa Setyembre 14.

Ang nasabing pagtatanggol ni Ancajas (30-1-1, 20 KOs) sa hawak niyang International Boxing Federation belt ay isasama sa undercard ng salpukan nina WBC light welterweight champion Jose Ramirez at  Antonio Orozco sa Save Mart Arena sa Fresno, California.

Matagumpay na naidepensa ni Ancajas ang kanyang IBF super flyweight title matapos talunin si Cebuano challenger Jonas Sultan via unanimous decision noong Mayo 26 sa Fresno, California.

Matatandaang nakamit ng 25-anyos na tubong Panabo City, Davao Del Norte ang IBF belt makaraang biguin si Puerto Rican McJoe Arroyo noong Setyembre ng 2016.

Sa kanyang unang title defense ay umiskor si Ancajas ng seventh-round stoppage kontra kay Mexican Jose Alfredo Rodriguez sa Macau, China.

Isinunod ni Ancajas sina Japanese fighter Teiru Kinoshita (seventh-round TKO) noong Hulyo ng 2017 sa Brisbane, Australia at si Irishman Jamie Conlan (sixth round TKO) sa Belfast, Northern Ireland.

Pinahinto naman ni Ancajas si Mexican Israel Gonzalez sa 10th round sa Corpus Christi, Texas bago talunin si Sultan.

Lumalaban si Ancajas sa bakuran ng Top Rank Promotions ni Bob Arum.

Ilan sa mga posibleng labanan ni Ancajas ay sina Alejandro Santiago (16-2-4, 7 KOs) ng Mexico at Miguel Gonzalez (26-1-0, 8 KOs) ng Chile.