San Francisco mitagak sa Consolacion, bag-ong north champion sa Gov's Cup

CEBU, Philippines — Si Kenny Rogers Rocacurva mikulit og 19 sa iyang 27 puntos sa second half, apil na ang krusyal nga unom ka sagunson nga free throws sa himalatyong segundos aron baswaton ang San Francisco batok sa Consolacion Sarok Weavers, 72-71 sa tagakay nga duwa sa ilang best-of-three finals sa miaging gabii diha sa Cebu Coliseum.

Gumikan niini, ang San Francisco milugwa nga bag-ong North Division champion ug maoy magkig-atbang sa hawod sa South nga Talisay City Aquastars sa usa ka best-of-three series alang sa overall championship sa Cebu Governor's Cup Inter-Cities and Municipalities Under-21 Developmental Basketball Tournament.

Ang Talisay nga wala pa'y pilde sa 12 ka duwa, maoy mo-host sa Game 1 karong Hulyo 16. Ang Game 2  molabyog sa San Francisco karong Hulyo 19, samtang ang Game 3, kon gikinahanglan, duwaon karong Hulyo 21 diha sa Cebu Coliseum.

Ang San Francisco nadakin-as human miposte og 66-60 nga bentaha sa nahibiling 4:42 sa aksiyon gumikan kay ang Consolacion milusad og 11-2 rally aron pag-ilog sa labaw, 71-68 sa katapusang dos minutos.

Mainat pa unta sa Sarok Weavers ang ilang labaw, apan ang sinaligan nilang si Emmanuel Villamor nasipyat sa duha niya ka free throws.

Sa sunod nga posisyon, si Rocacurva kalmado kaayong milansang sa iyang free throws human gi-foul ni Patrick Montano hinungdan nga nakasikit ang San Francisco ngadto sa 70-71.

Wala na gyud makahimo pa og usa ka maanindot nga diskarte ang Consolacion sa katapusan nilang posisyon.

Nasamutan pa ang ilang kalbaryo sa dihang ilang gi-foul si Rocacurva nga  mipasud sa iyang free throws sa nahibiling 7.9 segundos nga maoy nagtuldok sa makutas nga daog sa San Francisco.

Sa gihapon, si Rocacurva nakaangkon og igong suporta gikan nilang Jake Laurence Gonzales ug Wilson Plenos Jr. nga nagkumboya'g 27 puntos.

Si Villamor mihipos og 18 puntos sa Consolacion nga mangindahay na lang karon sa ikatulong dapit batok sa Sibonga Pillars.