Reyes wala pa kadesisyon

CEBU, Philippines – Dili pa makahatag si  coach Chot  Reyes  sa  12  ka  players nga mamahimong final line-up sa Gilas Pilipinas nga makigsangka sa Chinese Taipei karong Biyernes didto sa Taiwan.

Hinuon, mipasalig si Reyes nga hapit na niya ibutyag ang final 12, apan iya pa nga gitun-an og maayo ang kombinasyon sa mga magduduwa ilabi na nga krusyal ang sangka nila sa Chinese Taipei.

Seguradong  malakip sa final 12 mao sila si naturalized center Andray Blatche, team captain Jayson Castro, PBA MVP JuneMar Fajardo ug Cebuano RR Pogoy.

Ang Gilas mipahigayon og team practice kagahapon usa ka adlaw human sila miabot didto sa Taiwan.

Matud ni Reyes nga usa ka delikadong Chinese Taipei ilang sangkaon tungod kay  kausa lang kini midaog sa upat ka duwa.  Kun modaog ang Chinese Taipei may paglaum pa sila nga moabante sa second round sa qualifiers.

Kini kay ang top three teams sa group stage ang makasulod sa sunod round. Ang Gilas nahimutang sa ikaduhang dapit sa ilang 3-1 sa ilang  bracket  nga  gidominaran  sa  Australia (4-0).