E&F Surplus miabante na sab sa semifinals

CEBU, Philippines — Nagpakitang gilas na sab si Fury Trazona aron giyahan ang iyang team E&F Surplus nga milubong sa Pilapilan, 87-65 aron moabante sa crossover semifinals sa 12th J&J Surplus basketball tournament niadtong Huwebes didto sa GT Academy gym sa Tayud, Lilo-an.

Daw gisakyan og buynas si Trazona gumikan kay gawas nga nagtusak-tusak ang iyang mga puntos, nasulod sab ang lisud niyang acrobatic shot nga nakapahugyaw sa mga tawo.

Ang team owner nga si Trazona miariya og 17 puntos, samtang ang iyang katimbang nga si Tata Betinol mitikdol og 16 puntos. Si Loreto Igoy mitimbre og 14 puntos sa E&F Surplus, kansang duwa wala gyud molubad gikan sa pagsugod hangtod nahurot ang oras.

Sila si Cobi ug Vega nagkumbuya'g 24 puntos aron pangulohan ang natagak nga Pilapilan.

Sa laing aksiyon, buhi pa ang paglaum sa RJ Store nga moabante sa semis human gipilde ang 'twice-to-beat'  nga Team Bang, 98-93.

Lima ka players sa RJ Store ni Jun Rayan Pepito ang miiskor og double pinangulohan ni Johnrey Caparroso nga mikandos og 18 puntos, samtang ang Team Bang gipangulohan nilang A. Pitogo ug Tabon nga mibugha og 20 puntos matag usa.

Ubos sa bendisyon sa ballclub president Henry Agbon, ang liga gipadagan ni commissioner Fury Trazona sa abag nilang Jeper Inahid, Russel Dacalos ug Choy Pilapil.

PUNTOS MATAG USA

Unang duwa:

E&F Surplus (87) – Trazona 17, Betinol 16, Igoy 14, Caballes 9, Jubay 8, A. Sabang 6, K. Sabang 6, Nuñez 4, Betinol 2.

PILAPILAN (65) – Cobi 14, Vega 10, Bolande 9, Royaks 6, Orque 6, Quijada 4, Jinly 4, Teter 4, Salogaol 3, CJ 2.

Ikaduhang duwa:

RJ Store (98) –  Caparroso 18, Suson 17, Yerro 15, Baring 15, Sayta 14, A. Pepito 6, Brigoli 6, Bai Bogz 3, Nogas 2, Rojo 2, R. Pepito 2.

TEAM Bang (93) – A. Pitogo 20, Tabon 20, Mongcal 17,  Jerez 9, Arian 9, Callet 6, Pepito 6, Segue 4, Maglasang 2, Maghanoy 2.