Mercado, Laplap gauna sa Run for Gift of Life
CEBU, Philippines — Sila si AJ Mercado ug Maria Cela Laplap maoy labing dakung mananaog sa second edition sa Run for Gift of Life kagahapon didto sa Robinsons Galleria Cebu.
Si Mercado maoy labing paspas sa 16K men's class human niya gilabang ang finish line sud sa usa ka oras, 12 minutos ug 31 segundos. Nagsunod kaniya si Fr. Clement Covacho sa oras nga 1:20:28, samtang si Ronald Estrolezo maoy third placer sa oras nga 1:22:20.
Sa pikas bahin, si Laplap nanghawud sa women's sa oras nga 1:25:35. Iyang gilupig si Anne Diano kinsa second placer sa oras nga 1:41:48, samtang si Princess Abdul misakiyo sa ikatulong dapit sa oras nga 1:45:27.
Sa 8K male, si Lee Stephen Fat (37:32) maoy kampiyon gisundan nila ni Julius Baclaan (41:12) ug Jule Drix (41:19) sa ikaduha ug ikatulong luna.
Si Cheska Rago maoy labing paspas sa women's class sa oras nga 42:35. Ang second ug third placers mao sila si El Marie Albeos (43:19) ug Carmela Quijano (43:41).
Ang top three finishers sa 3K women's mao sila si Nicole Del Rosario (14:06), Justine May Montecillo (18:54) ug Paula Pragados (21:01), samtang sila si Vince Jeter Lasquitas (11:21), Kenneth Languido (12:17) ug Francis Kyle Policarpio (12:28) maoy tulo sa labing paspas sa men's class. (BANAT NEWS)
- Latest