Casino moparada ex-CESAFI stars sa MPBL
CEBU, Philippines – Kanhi mga bitoon sa Cebu Schools Athletic Foundation, Inc. (CESAFI) sagad maoy naglangkob sa 18-man line-up sa Casino Active-Cebu Niños nga moduwa sa Maharlika Pilipinas Basketball League (MPBL) Second Conference nga mosikad sunod bulan.
Unom kanila mga produkto sa 12-time CESAFI champions University of the Visayas (UV) Lancers. Sila mao si John Abad, Harold Cincoflores, Franz Arong, Alfred Codilla, Raffy Oktubre ug Cesar Catli.
Si Catli unang mibaid sa iyang abilidad isip sakop sa UV Baby Lancers sa wala pa siya molayat sa Far Eastern University (FEU) Tamaraws sa UAAP. Lain pang mga garbo sa CESAFI nga moduwa sa International Pharmaceuticals Inc. (IPI)-backed squad mao sila si Enrico Llanto, William McAloney ug Ian Ortega sa University of San Carlos, Victor Nuñez ug Kevin Villafranca sa University of San Jose-Recoletos, Bernie Bregondo ug Jun Luz sa Southwestern University (SWU)-Phinma ug Garex Puerto ug Mark Abadia sa University of Cebu. Nagkumpleto sa Team Niños mao sila si Iron Suano, Jondan Salvador ug Erick Rodriguez.
Ang ikaduhang komperensiya sa labing unang MPBL season sugdan karong Hunyo 12. Ang format niini sama sa NBA gumikan sa pagsalmot sa expansion teams gikan sa Kabisay-an ug Mindanao. Gibahin ang mga entranteng koponan ngadto sa Northern ug Southern Divisions, diin ang division champions mag-abot sa National Championships. Ang modaog makadawat og tropeyo nga gidayan-dayanan og bulawan nga nagkantidad og P10 million ug ingon man singsing sa matag miyembro sa koponan.
- Latest
