Rehistrasyon sa Sunsport basketball camp gitakda

CEBU, Philippines - Mas taas nga panahon ang gigahin alang sa rehistrasyon sa ika-24 nga season sa Sunsport Basketball Training Camp nga gikatakda karong Marso 27 hangtud sa Abril 2 diha sa Sacred Heart Center Sports Club kilid lamang sa Sacred Heart Church sa may dalan D. Jakosalem ning dakbayan sa Sugbu.

Ang tinuig nga kalihukan pormal sugdan karong Abril 3 ug abli niadtong mga nag-edad og siyete anyos pataas. Ang entry free nagkantidad og P1,300 matag bulan apil na niini ang training jersey, basketball, shoe bag ug t-shirt hinungdan nga makakuha gyud sa mga partisipante ang balor sa ilang kuwarta gawas nga makapahimus sila sa dekalidad nga pagbansay-bansay.

Alang sa dugang impormasyon, kadtong mga interesado mahimong mokontak sa 345-1015 o 0923-8697421.

Ubos sa superbisyon ni coach Jojo Romarate, ang training pagahimoon matag adlaw, sugod sa alas-8 hangtud sa alas-10 sa buntag alang sa siyete hangtud sa 11 anyos nga mga entrante ug gikan sa alas-10 sa buntag hangtud sa alas-12 sa udto alang sa mga campers nga nag-edad og 12 anyos pataas.

Ang unang level alang sa mga beginners modagan hangtud sa Abril 28. Ning puntoha, tudloan ang mga bata sa saktong pamaagi ug porma sa pag-itsa, pagdribol ug pagdala sa bola.

Ang ikaduhang level sa training kon 'advanced' gikatakda sa Mayo 1-26. Ning higayona, makat-on ang mga estudyante sa teknikal nga aspeto sa duwa sama sa pipila ka stratehiya sa opensa ug depensa, transition plays, on-court communication ug uban pa.

Sa dili pa ang training camp, ang Sunsport mopasiugda og usa ka libreng seminar kabahin sa basketball skills training ug conditioning techniques karong Marso 25 diha sa Sacred Heart Center Sports Club.

Sugdan sa alas-8 sa buntag hangtud sa alas-12 sa udto, ang workshop/seminar abli sa tanang mga mahiligon og basketbol, magtutudlo sa PE, school coaches ug mga atletang estudyante.

Mopadagan niini si US-based Cebuano skills trainer ug coach Jeff Codera. Ang garbo sa Tabok, Mandaue City miyembro sa training camp sa Golden State Warriors sa NBA ug lisensiyadong Gold coach sa USA Basketball. (EBV) (BANAT NEWS)