Panahon na ni Melindo

CEBU, Philippines - Panahon na ni Milan ‘El Metodico’ Melindo (34-2, 12KOs) nga ipabuhagay ang tanan niyang abilidad aron masiguro ang iyang kadaugan, ingon man makuptan ang kalibotanong bakus  sa dihang harungon na niya si Fahlan Sakkreerin Jr. (31-4, 16KOs) sa Thailand sa ilang interim IBF light flyweight title showdown sa main event sa “Pinoy Pride 39: Road to Redemption” fightcard karong gabii diha sa Cebu Coliseum.

“Ready na ang tanan. Maayo akong kontra pero andam na among game plan para niya (Sakkreerin),” matud pa ni Melindo nga mitimbang og 108 lbs., bug-at og usa ka libra  ni Sakkreerin atol sa official weigh-in kagahapon didto sa Robinsons Fuente.

“Mogamit ko og body shots ug didto akong kuhaon ang knockout.”

Kini ang ikatulong higayon ni Melindo nga mahimong world champion. Sa una niyang  title fight, si Melindo napukan ngadto ni Juan Francisco Estrada pinaagi sa ‘unanimous decision’  niadtong tuig 2013.  Napilde sab siya sa ikaduha niyang pagsuway    pinaagi sa sixth round ‘technical decision’ atol sa ilang IBF title match ni Javier Mendoza niadtong Mayo 30, 2015 didto sa Mexico.

“Mas pabor gyud nako ang tanan karon,” matud pa sa Cagayan de Oro City fighter. “Motivated ko nga mahimong champion atubangan sa mga Pinoy.”

Si ALA Promotions President ug CEO Michael Aldeguer midasig ni Melindo nga mokulit og daog   aron   mahitabo ang sangka niini batok ni Japanese champion Akira Yaegashi, kinsa wala makadepensa sa iyang titulo tungod sa injury.

Sa supporting bout, si ‘Prince’ Albert Pagara (26-1, 18KOs) mosuway pagpapas sa huna-huna sa iyang mga fans ang ngil-ad niyang eight round knockout nga kapildihan batok ni Mexican Cesar Juarez niadtong Hulyo 7 didto sa California.

Ang 22-anyos nga boksidor makigharong sa Ghanaian nga si Raymond Commey (16-1, 9KOs).

Sa laing bahin, ang maguwang ni Albert nga si WBO No. 1 junior welterweight Jason ‘El Niño’ Pagara (39-2, 24KOs) moaway usab batok ni ex-world champ  Nicaraguan Jose Alfaro (28-10, 24KOs).

Sa undercards,  lima ka  ALA boys  nga sila si Jeo ‘Santino’ Santisima, Jimmy ‘Popeye’ Paypa, Jonas ‘Zorro’ Sultan, Melvin ‘Gringo’ Jerusalem ug Kevin Jake ‘KJ’ Cataraja ang mopakita sab og aksiyon sa maong boxing card nga gipasiugdahan sa ALA Boxing Gym ug ABS-CBN Sports. (BANAT NEWS)