Transformers nakabalik sa porma, Tigresses pinaamo
MANILA, Philippines – Ibinuhos ng Bureau of Customs ang ngitngit nito sa University of Santo Tomas matapos itarak ang 25-17, 26-24, 25-15 panalo upang mahablot ang ikatlong panalo kagabi sa Shakey’s V-League Season 13 Reinforced Conference sa The Arena sa San Juan City.
Mas solido ang galaw ng Transformers nang pagbidahan ni three-time UAAP MVP Alyssa Valdez ang attack line tangan ang 19 puntos na nabuo mula sa 15 kills, dalawang blocks at dalawang aces katuwang si Thai import Kanjana Kuthaisong na nagdagdag naman ng 16 hits.
Naglista naman ng pinagsamang 12 puntos sina Lilet Mabbayad at Rosemari Vargas habang muling naglabas ng solidong laro si Thai setter Natthanicha Jaisaen na gumawa ng 44 excellent sets.
Sumulong ang Transformers sa 3-1 rekord para masolo ang ikalawang puwesto.
Sa ikalawang laro, naikabig ng Open Conference champion Pocari Sweat ang 25-20, 25-17, 25-23 panalo laban sa University of the Philippines para umangat sa 2-1 baraha.
Lumasap naman ang UP ng ikatlong kabiguan sa apat na laro.
Sa Spikers’ Turf Season 2 Third Conference, nalusutan ng defending champion Cignal ang Champion Supra sa pamamagitan ng 25-18, 37-35, 23-25, 17-25, 15-12 desisyon para makuha ang ikalawang panalo sa tatlong laro.
- Latest
