Donayre malampuson sa iyang comeback fight

CEBU, Philippines - Malampuson ang comeback fight ni Cebuano mixed martial artist Vaugh ‘Spawn’ Donayre human siya miiskor og first round technical knockout batok ni  Lucian Mocanasu sa Romania sa HardKnox Fight Night 3 sa miaging gabii didto sa Park Rotana sa Abu Dhabi, United Arab Emirates.

Bisan pa og kapin usa ka tuig nga wala siya kaaway og MMA, gipakita ni Donayre wala pa matay-i ang iyang abilidad dihang  gilatos niya si Mocanasu gamit ang bangis nga ground and pound nga mipugos sa referee nga undangon ang away sa 3:27 sa opening round.

Giisip nga delikadong kontra si Mocanasu tungod kay usa kini ka karate ug sambo blackbelt, apan wala mosalir iyang abilidad dihang gidumog dayon siya sa Cebuano featherweight.

Si Donayre, kinsa atua na magbasi sa Dubai,  kanhi Yaw-Yan ArDigma ug Deftac Cebu fighter mipalambo sa iyang rekord ngadto sa 8-3 diin giputol niya ang tulo ka sunod-sunod nga pilde.

Tuyo ni Donayre nga masumpayan ang iyang daog sunod niyang sangka sa Enero 25 didto gihapon sa Abu Dhabi.  (BANAT PALARO)