Tam-is nga kadaogan sa CEI ni Camay

CEBU, Philippines – Usa ka major upset ang gihimo sa CEI Brokers ni team owner Wiljun "Sugar" Camay human ilang gipukan ang MP Brokers sa iskor 77-65 kaniadtong Huwebes sa gabii sa nagpadayon nga BOC Friendship Cup Christmas League didto sa barangay Tinago gym, ning dakbayan.

Sa primerong duwa, midaog ang Alin Customs Brokerage ni team owner Israel Alin batok sa Chamber of Customs Brokers, Inc. (CCBI) sa iskor, 107-51 diin ang 56 puntos nga kadaogan maoy ikaduha karon sa record isip labing dako nga winning margin human sab ilubong og taga-liog sa Kentkyle Cuisine ang mao gihapon team sa iskor, 132-54 aron modaug og 78 puntos niadtong Oktubre 21.

Ang Big Three sa CEI nga silang Kerker dela Cerna, Jojo Solitario ug ex-UC Webmaster point guard Bennick Selana maoy nangu sa opensa sa CEI nga maoy mitugbang sa mga pambato sa MP nga naglakip kanilang ex-USPF Panther Glenn Pendang ug kanhi UST Growling Tiger Micmic Sumalinog.

Duna karo'y himoong imbestigasyon ang presidente sa BOC Friendship Cup ballclub nga si Ryan Barral karong udto aron magsuta kung kinsay sad-an tali kanilang duha ni Noel Medalle sa MP ug ni Jeff Garcia sa CEI kinsa nakatilaw og tikdol sa iyang nawong gikan ni Medalle.

Wala ra hinoon magubot ang maong duwa tungod kay nahusay ra kini sa mga mabugnawon og utok nga mga players apan maoy gusto ni Barral nga pahamtangan og silot ang sad-an aron dili na mausab ang susamang hitabo sa mosunod nga mga adlaw aron dili maanugon ang ilang kawsa sa pagpahigayon og torneyo nga mao ang panaghigalaay.

Si Dela Cerna miposa og 19 puntos alang sa CEI ug may 18 ug 14 puntos matag usa silang Solitario ug Sealana.

Tungod sa maong kadaogan, aduna na karo'y 4-0 nga baraha ang CEI ug dili lang kay sila na maoy solo leader, posible pa gyud nga ilang ma-sweep ang elimination kay dili na kaayo lig-on ang mosunod nilang mga kontra.

Sa labing unang higayon sulod sa duha ka tuig, mao sab kini ang unang higayon nga nagsugod og 4-0 ang CEI ug matod pa ni Camay nga malipayon kaayo, daw sa midaog na gani sila'g championship sa ilang naabtan karon.

Sa laing duwa, lima ka players sa Alin Brokers ang mibahug og double figures  nga gipangulohan ni Demo Nuevo Filoteo sa iyang 15 puntos.

Puntos matag usa:

First Game:

Alin Brokers (107) – Filoteo 15, Gamao 14, Sanguenza 12, Perolino 12, Villomo 10, Cayanong 8, I. Alin 6, Baltonado 6, Nudalo 4, Palero 4, Tarona 4, Lleve 4, Singson 2.

CCBI (51) – Labana 10, Alawi 10, Avenido 8, Solis 7, Ejes 6, Rongcales 4.

Second Game:

CEI Brokers (77) – Dela Cerna 19, Solitario 18, Selana 14, R. Bantulay 7, C. Bantulay 5, Munez 4, Fernandez 3, Laborte 3, W. Camay 2, Agpalo 2.

MP Brokers (65) – Jadraque 15, Pendang 12, Elloren 11, Sumalinog 11, Gambe 5, Pangue 4, Enriquez 4, B. Medalle 3. (BANAT NEWS)