Wolves gidagit sa Eagles

CEBU, Philippines – Sagunson nga ika-upat ka daog maoy nadagit sa Sacred Heart School-Ateneo de Cebu Magis Eagles dihang yano nilang gilbuong ang Don Bosco Technology Center Junior Greywolves samtang 3-0 na karon ang University of San Carlos Baby Warriors human ilang gibaraw ang Cebu Eastern College Dragons, 57-49 sa duha ka duwa sa juniors division sa 15th season sa Cebu Schools Athletic Foundation, Inc. (CESAFI) kagabii didto sa Cebu Coliseum.

Ning pagsuwat sa alas sayis sa gabii, naglawig na ang University of the Visayas Green Lancers ngadto sa ilang sagunson nga ika-upat sab ka daog tungod kay dako na kaayo sila'g labaw batok sa University of Southern Philippines Foundation Panthers kinsa ilang gibiyaan atol sa halftime og 31 puntos, 55-24.

Sa main game kagabii, nagsangka sab ang defending champion Southwestern University Cobras batok sa unpredictable University of San Jose Recoletos Jaguars apan wala pa makuha sa Banat Sports ang resulta.

Ang 4-0 nga Magis Eagles kinsa midaog sab kagahapon batok sa UV Baby Lancers, 73-64, gipangulohan ni Trvis Jelour Mantua sa iyang 14 puntos ug midugang silang Andrew Velasco ug Jed Colonia og 10 ug 9 puntos matag usa.

Bugtong si Reinnel Nino Gabisay maoy nakahimo'g double figures alang sa Junior Greywolves sa iyang 13 puntos.

Sa laing bahin, balanse nga opensa maoy gihimo sa Baby Warriors tungod kay halos silang tanan naka-iskor ug wala'y bisan usa kanila ang mihimo'g double figures kung itandi sa Dragons nga may duha ka players nga mikulit og double digits nga silang James Daniel Tempra sa iyang 20 puntos ug  John Vincent Galarse sa iyang 13 puntos.

Kaniadtong Sabado, mikulit sa labing una nilang daog sulod sa upat ka duwa ang Cebu Institute of Technology-University Wildcats batok sa University of Cebu Webmasters sa labing unang overtime game sa CESAFI, 92-87. (BANAT NEWS)