San Mig Food Ave. nagsolo sa liderato sa As-Es B.A.R.
CEBU, Philippines - Temporaryo karong nagsolo sa liderato ang San Mig Food Ave. human makaipsot sa kulbahinam nga duwa batok sa As-Es Sportswear, 75-74 sa nagpadayong As-Es B.A.R. 2nd Conference Fiesta Cup 2015 basketball tournament niadtong Lunes diha sa Benjamin Solon Memorial Gym sa Cogon Ramos.
Ang San Mig Food Ave. nga adunay 2-0 record gipangulohan ni Tikwil Cabañero, kinsa mikadlit og 18 puntos, gisundan ni Richard Molina sa iyang 13 puntos.
Sila si Brickmer Alesna ug Louie Galon parehong mikamada’g 10 puntos alang sa San Mig Food Ave. nga milansang og 51-37 nga bentaha sa halftime.
Miaksiyon og gukod ang As-Es Sportswear sa third period sa pagpangulo ni Randyll Roncal, apan nausik ang iyang paningkamot kay gipakgang kini sa San Mig Food Ave.
Si Roncal mao lang ang bugtong nakaiskor og double digits sa As-Es Sportswear pinaagi sa iyang 18 puntos.
Sa laing aksiyon, ang Predelusis nangayo pa og overtime una nila maangkon ang kutas nga kadaugan batok sa White Castle, 98-96.
Si Mama Ocampo mipabuhagay og 28 puntos aron maoy mangu sa Predelusis nga mi-rally sa third quarter aron maoy himuong taytayan pagpugos sa duwa ngadto sa overtime.
Ang Predelusis nakakuha sab og maayong suporta gikan nilang Aaron Miñoza nga mitampo’g 18 puntos ug nilang Jeff Bernal ug Mark Predelusis nga adunay 10 puntos matag usa.
Nangu sa White Castle mao si Mike Francis sa iyang 17 puntos, gisundan ni Nilo Reyes nga adunay 15 puntos. Si Nestor mitampo’g 14 puntos, samtang sila si Earl Llenes ug Bokloy Malalay nagkumboya’g 23 puntos alang sa White Castle nga wala pa makatagamtam og daog sa duha nila ka duwa. (BANAT NEWS)
PUNTOS MATAG USA
Unang duwa:
Predelusis (98) – Ocampo 28, Miñoza 18, Bernal 10, Predelusis 10, Sabal 8, Raboy 5, Rodriguez 4, Del Carmen 4, Murillo 3, Melencion 2, Villaber 2, Secuya 2, Abrio 2.
White Castle (96) – Francis 17, Reyes 15, Compra 14, Llenes 13, Malalay 10, Romiquito 6, Rosaroso 6, Llenes 5, Llanos 5, Lanutan 4, Cartagena 2.
Ikaduhang duwa:
San Mig Food Ave. (75) – Cabañero 18, Molina 13, Alesna 10, Galon 10, Sanchez 6, Torres 6, Arellano 5, Cababanay 5, Cabantog 2, Regidor 2, Borres 2.
As-Es Sportswear (74) – Roncal 18, Martinez 9, Astudillo 8, Magsayo 8, Sico 8, Bantolinao 7, Palamang 5, Sebrero 3, Endab 2, Estenza 2, Du 2, Coyoca 2.
- Latest
