Power Forty nimasaker sa SBC Alumni

CEBU, Philippines - Nabalikan sa ilang kamangtas sila si Robert Abasolo ug Edward Buhay diin nagkumboya sila og 53 puntos aron mangu sa Power Forty nga wa’y puangod milubong sa SBC Alumni sa iskor nga 121-93 sa Saint Augustine Cup 2015 Inter-ballclub basketball tournament niadtong Lunes sa gabii didto sa Inayawan Sports Complex.

Si Abasolo mikadlit og 30 puntos, samtang si Buhay mipugnit og 23 puntos alang sa Power Forty nga milansang og 15 puntos sa halftime, 65-50.

Grabe sab kaayo nga nakaduwa si Nando Sumargo, kinsa miambit og 16 puntos sa Power Forty nga nakapanimaho sa ilang sayong kadaugan human milansang og 33 puntos nga bentaha, 97-64 paingon sa final period.

Nakatampo sab og daku sa kadaugan silang Cesar Ortega ug Alex Mercado nga miabuno’g 14 ug 10 puntos.

Sila si Insek Fernandez ug Lester Camay parehong mipabuto og 22 puntos aron pangulohan ang SBC Alumni, samtang si Junel Dico miamot og 10 puntos sa kapildihan.

Ang Power Forty ni coach Michael Arias ug Edwin Dejacto Sr. hugot nga gipaluyohan sa ilang presidente nga si Lando Almojallas ug sa mga team manedyer sa ballclub nga sila si Atty. Flor Yosores, Romy Rama, Vez Eleguin, Bob Samson, Chino Kalinga ug Fred Tantoy, ang tag-iya sa Water Market. 

Ang mga duwa gidumala ni league commissioner ug barangay councilor Insik Tibay inabagan sa iyang technical committee nga si Kenneth Montaña.

Ang liga usa sa mga dagkung kalihukan alang sa tinuig nga kapistahan sa mahal nga patron sa Inayawan, Saint Augustine karong Agosto 29.

Puntos matag usa

POWER FORTY (121) – Abasolo 30, Buhay 23, Sumargo 16, Ortega 14, Mercado 10, Misa 7, Cabrera 6, Tantiado 6, Capala 5, Veloso 4.

SBC ALUMNI (93) – Fernandez 22, Camay 22, Dico 10, Soon 9, Jaca 9, Navares 8, Cortez 5, Quimada 4, Bacalso 2, Monteza 2. (BANAT NEWS)