CEBU, Philippines - Dili lang de kampanilyang abogado kini si Iloilo Fifth District Representative Neil Tupas Jr., apan may abilidad sab kini sa laing korte -- ang basketball court.
Si Tupas, ang lead counsel alang sa government panel atol sa Supreme Court Justice Renato C. Corona Impeachment hearing, miburak og 25 puntos, lakip ang unom ka three-pointers alang sa Team Iloilo batok sa Tuburan-LGU atol sa usa ka exhibition game nga natapos sa 97-all stalemate niadtong Martes sa gabii diha sa City Sports Club Cebu gym sa Cebu Business Park
Hinuon, ang manghod ni Cong. Tupas nga si Barotac Viejo Mayor Bheng Tupas maoy nangu sa Iloilo (Junjun Team) sa iyang 31 puntos.
Ang Tuburan nga gipangulohan ni Mayor Aljun Diamante, kinahanglan na lang unta’g maayong depensa sa katapusang 16.5 segundos aron makaipsot kay sila maoy naglabaw, 97-94, apan wala nila mabantayi si Bheng nga libre sa daplin ug mipataroy og three-pointer aron tablahon ang duwa sa 97-all.
Si JR Obado maoy nangu sa Tuburan sa iyang 19 puntos, samtang si Alfred Belande miamot og 14 puntos.
Si Mayor Diamante, kinsa mihimo’g duha ka triples, mitikdol og nuybe puntos alang sa Tuburan ug ang iyang manghod nga si Danny, ang vice mayor sa Tuburan, midugang og 11 puntos.
Puntos matag usa
Team Iloilo (97) – B. Tupas 31, Jacob 26, N. Tupas 25, Bunny 7, Miguel 4, Ram 2.
Tuburan (97) – Obado 19, Belande 14, Brigoli 14, D. Diamante 11, A. Diamante 9, Laguna 9, Durano 9, Guerilla 6, Castro 4. (BANAT NEWS)