"Fight not made yet"
CEBU, Philippines – Hugtanong gihimakak ni Floyd Mayweather, Jr. ang taho nga duna nay nakab-ot nga kasabotan ang iyang grupo ug ang kampo ni Manny Pacquiao kabahin sa gikahinaman nilang away nga tentatibong gikatakda karong Mayo 2 didto sa MGM Grand sa Las Vegas.
Nahugyaw ang kalibutan sa boksing sa miaging adlaw human ang celebrity gossip website nga TMZ mipagawas og taho nga hingpit nang naselyado ang maoy gi-atngan nga kumbati sa mga fans tibuok kalibutan.
Wa hinoon hatagi og gibug-aton ang maong balita sa mga representante nilang Mayweather ug Pacquiao kay alang kanila hugon-hugon lamang kini ug way igong basihan.
Gani mismo si Mayweather na ang namahayag nga way kamatuoran ang taho sa TMZ ug usa lamang kini sa pipila ka mga bakak nga nanglugwa sa nagpadayong negosasyon karon sa ilang superfight.
Gamit ang hashtag nga "FightNotMadeYet" sa iyang social media account, si Mayweather nagkanayon:"While they continue to lie about making the fight... I'm just going to continue to travel and explore the world on my private jet. #FightNotMadeYet #Jamaica."
Sa iyang bahin, ang promoter ni Pacquiao nga si Bob Arum nagkanayon nga dunay dakong kalamboan nga nahitabo kabahin sa nahitabong panagsabot-sabot sa duha ka kampo, apan may pipila pa ka mga detalye nga han-ayon aron mapinalisar na ang maong megafight nga gibana-banang mokita og dili mominus sa $300 million kun ugaling mahinayon.
Ang labing mahinungdanon nga isyu nga hangtud karon wala pa mahusay mao na lang ang pamaagi unsaon pagpasalida sa telebisyon ang maong gikahinaman nga engkuwentro sa tibuok kalibutan. Kini kay si Pacquiao duna may kontrata sa Time Warner/HBO, samtang si Mayweather anaa sa poder sa CBS/Showtime.
Apan masaligon ang duha ka kampo nga masulbad ra kini sa kadugayan kay nahitabo naman kini sa una niadtong tuig 2002 atol sa away nilang Lennox Lewis ug Mike Tyson. — Emmanuel B. Villaruel gikan sa Agence France Presse (BANAT NEWS)
- Latest
