Istilo ni Pacquiao kakayanin ni Algieri

MANILA, Philippines - Bagama’t iisa ang ka­nilang chief trainer ay magkaiba ang istilo nina Filipino world eight-division champion Manny Pacquiao at da­ting world light welterweight titlist Ruslan Provodnikov.

Alam na ni Chris Algieri ang lakas ni Provodnikov at alam na niya ang kanyang gagawin sa pagsagupa kay Pacquiao sa kanilang laban sa Nobyembre 23 sa The Venetian sa Macau, China.

“He’s a fantastic fighter but in terms of his style and Manny’s they are completely different and the preparations for each are completely different but that is no different for me because I am always fighting guys with different styles,” pagkukumpara ng 5-foot-10 na si Algieri sa 5’9 na si Provodnikov at sa 5’6 na si Pacquiao.

Pipilitin ng 30-anyos na si Algeiri na maagaw sa 35-anyos na si Pacquiao ang suot nitong World Bo­xing Organization (WBO) welterweight crown.

Ayon sa New Yorker, iba’t ibang klase ng boksingero ang kanyang nakasagupa sa perpektong 20 panalo niya.

At hindi na bago sa kanya ang anumang ipapakita ni Pacquiao sa kanilang laban.

“I have not been one of those champions that have been fed perfect guys to make me look great. I have had to fight every single style coming up on my way to get here I wasn’t fed anyone in any point of my career,” ani Algieri.

Nakamit ni Algieri ang karangalang hamunin si Pacquiao matapos talunin si Provodnikov via split decision sa kabila ng dalawang beses na pagbagsak sa first round para maagaw sa Russian ang suot nitong WBO light welterweight belt noong Hunyo.