Tiukinhoy mihatag bendisyon sa CESAFI teams

CEBU, Philippines -  Gitugotan ni Cebu Schools Athletic Foundation  Inc. (CESAFI) commissioner Felix O. Tiukinhoy Jr. ang mga koponan nga miyembro sa liga nga mosalmot sa Cordova Inter-Collegiate basketball tournament sunod buwan didto sa Cordova Sports Complex.

 Hinuon, wala pa sila  masayod kun pila ka teams ang interesadong mosalmot hangtod dili pa nila masuta gikan mismo sa mga coaches. Adunay coaches' meeting  karong Hunyo 4 kalabot sa maong torneyo.

 Ganting salapi ang madawat sa mga top performers diin ang kampiyon mobulsa'g P50,000, ang second placer makadawat og P30,000, samtang ang third ug fourth placers makaangkon og P20,000 ug P10,000 matag usa.

 Matud pa ni Tiukinhoy, nga maayo ang gibuhat sa Basketball Association of Cordova (BAC) pag-imbitar sa mga CESAFI teams kay maisip kini nilang pre-season games.

 Sila si konsehal Roque Yburan ug Nicolas Tura ug ingon man silang Antoine Pogoy ug Boy Allan Lataza pulos sakop sa bag-ong gitukod nga BAC.  Dili lang  ang Cordova maoy miimbitar sa mga CESAFI teams, apan lakip na sab ang  Compostela.