CEBU, Philippines - Dili na gyud kapugngan, moulbo na ang Sambag 1 Basketball Club (S1BC) Summer League 2014 1st Conference basketball tournament karong alas-3 sa hapon diha sa Sambag 1 Gym sa Sitio Tangkongan, barangay Sambag, Cebu City.
Sa naandang tradisyon, sugdan kini pinaagi sa usa ka parada nga salmotan sa 90 ka partisipanteng mga koponan uban sa tagsa-tagsa nila ka musa.
Ang koponan gibuak ngadto sa unom ka bracket diin ang matag grupo langkuban og 15 ka teams.
Adunay programa nga pagahimuon sa dili pa ang pormal nga duwa.
Si Sambag 1 Barangay Captain Lemar 'Memat' Alcover ug barangay councilor Giovani S. Aznar maoy pinasidunggang mga dinapit sa maong kalihukan.
Ang presidente sa S1BC nga si Allan Glen Abella maoy mobatbat sa opening prayer, sundan kini sa pagkanta sa National Anthem sa pagpangulo ni S1BC auditor Jupiter D. Kasayan. Si S1BC P.R.O. nga si Ranie 'Manoy' Pacaldo maoy mangu sa oath of sportsmanship ug ang ilang adviser nga si Daryl Yuvallos maoy pormal nga modeklara sa pagsugod sa torneyo.
Lain pang mga opisyales sa S1BC mao sila si Edwin Mabanto (vice president) ug Christopher Baran (secretary).