Cebu D-league tukuron
CEBU, Philippines - Gisugdan na karon ang pipila ka mga lakang alang sa pagtukod sa Cebu-D League diin ang tumong niini mao ang paghatag og dugang exposure sa mga players ilabi na kadtong wala kaayo makapakita sa ilang katakus sa Cebu Schools Athletic Foundation Inc. (CESAFI).
Ang amateur league gikatakdang buksan sa Marso 8 diha sa Cebu Coliseum ug gilauman nga adunay unom ka teams nga mosalmot niini.
Ang organizers sa Cebu-D League mao silang Cebu City Sports Commission (CCSC) chairman Michael Sy ug iyang amahan nga si Lorenzo 'Chao' Sy, kansang pamilya maoy nanag-iya sa La Fortuna Bakery ug Hotel Fortuna.
Matud pa sa batan-ong Sy nga ang bugtong tumong ug katuyoan sa Cebu D-League mao ang pagtabang sa mga players nga makakuha’g dugang exposure aron sa ugma damlag makaduwa sila sa PBA o di ba sa PBA-D League kun mataypan sa mga scout gikan sa Manila.
Sumala pa ni Sy nga menos gyud og liga ang Sugbu gawas lang sa CESAFI ug ingon man ang CESAFI-Partners’ Cup.
Dunay 10 ka players ang matag team diin ang tulo kanila pilion daan sa mga coaches ug ang pito niini mopailawom pa og drafting pinaagi sa lottery.
Niadtong interesadong mosalmot sa draft, ang deadline pagduso sa aplikasyon kutob lang karong bulana ug sa Pebrero 22 adunay pagahimuon nga training camp. Isumiter lang ang aplikasyon didto sa Hotel Fortuna.
Ang mga partisipanteng koponan mogasto lang og P60 mil sa kapin usa ka buwan nga torneyo diin P50 mil niini ang entry fee, samtang ang P10 mil alang sa usa ka 'surety bond' sa higayon nga mo-'forfeit' o mo-'walkout' ang team. (BANAT PALARO)
- Latest
