Simple likes maoy no. 1 seed

CEBU, Philippines - Milampos ang Simple Likes Resto Bar pagsakmit sa unang pwesto human ilang gipatapsingan ang BD Law Firm sa iskor, 124-123 sa kulbahinam kaayong sangka kaniadtong Miyerkules sa gabii atol sa nagpadayong 7th season sa FYA-Philip Zafra Cup 2014 basketball tournament didto sa barangay Tisa gym, ning dakbayan.

Sa laing duwa, gipatilaw sa Pimentel Bokers ni team owner Marty Pimentel sa una nilang pilde sa torneyo ang kanhi solo leader Angel Mary Pawnshop sa iskor, 109-100.

Tungod sa maong kadaugan, awtomatik sab miabante sa semifinals ang Pimentel Brokers isip no. 2 seed ug bye na sila uban sa Simple Likes Resto Bar.

Ang kanhi solo leader nga Angel Mary Pawnshop mitidlum ngadto sa ikatulong pwesto human sa maong kapildehan samtang ang D&L Sportswear maoy nakakuha sa ika-upat nga pwesto.

Ang Angel Mary makigsangka batok sa no. 6 nga BD Law Office sa quarterfinal playoffs samtang ang D&L makigtakos batok sa no. 5 nga Harolds Hotel diin ang modaug maoy moabante sa semifinals.

Nagtabla sa 121-all ang Simple Likes ug ang BD Law sa nahibiling 20 segundos sa duwa apan nakapasulod og three-pointer si Noel Medalle aron pagselyado sa kadaugan.

 Nakahimo pa unta sa iyang tirada gikan sa three-point area ang iyang manghud nga si Baeng Medalle apan duha lang sa tulo ka free throws ang napasulod sa nauwahi alang sa final score nga 123-124 ug wala makapigos og overtime ang BD Law.

Si Litro Mirasol maoy nangu sa Simple Likes sa iyang 26 puntos samtang midugang og 22 puntos si Medalle ug may 17 ug 16 puntos silang Victor Lastomen ug Carlito Sarsaba.            

Laing players sa Simple Likes nga mibahug og double figures mao silang Louie Baricuatro ug Ipe Sabalande kinsa miamot og 14 ug 11 puntos, matag usa.

Ang wala'y daog nga BD Law gipangulohan ni Tonyo Abella sa iyang 30 puntos ug parehong may 20 puntos silang Medalle ug Jonathan Cabañez.

Sa sayo pa, dakung rally ang gihimo sa Pimentel Brokers aron mudaog dihang nagkumboya ug 35 puntos silang Nico Laborte ug Ranel Patalita og 35 puntos sa third quarter ug ila pa gyung na-outscore ang Angel Mary, 27-15 sa fourth period aron modaug bisan pa sa ilang 20 puntos nga biya.

Si Dexter Caballero maoy nangu sa Pimentel Brokers sa iyang 34 puntos ug may 29 puntos si Laborte samtang may 20 puntos si Patalita.

Ang Angel Mary gipangulohan nilang McLain Alkuino ug Jim Rara sa ilang 19 puntos matag usa.

Puntos matag usa:

First Game:

Pimentel Brokers (109)— Caballero 34, Laborte 29, Patalita 20, Duran 14, Aglipa 7, Boysello 3, Malicay 2.

Angel Mary (100)—            Alkuino 19, Rara 19, Lim 15, Ramirez 14, Pardenilla 8, Dumaguit 7, Cajucson 6, Jabonero 5, Bermudez 2.

Second Game:

Simple Likes (124)—           Mirasol 26, Medalle 22, Lastomen 17, Sarsaba 16, Baricuatro 14, Sabalande 11, Abella 9, Zapanta 7, Dacayana 2.

BD Law (123)—                   Abella 30, Medalle 40, Cabañez 20, Cueme 18, Arrglo 17, Sabalande 11, Banzon 7. (BANAT NEWS)