Simple likes resto bar naka-eskapo

CEBU, Philippines - Mga krusyal nga baskets gikan nilang Ryan Dacayana ug Noel Medalle maoy nagbaswat sa Simple Likes Resto Bar ngadto sa 99-95 nga kadugan batok sa Pimentel Brokers ni team owner Marty Pimentel sa miaging weekend sa nagpadayong 7th FYA-Philip Zafra Cup 2014 basketball tournament didto sa barangay Tisa gym, ning dakbayan.

Sa laing duwa, nabihag sa D&L Sportswear ang solo leader Angel Mary Pawnshop aron patilawon sa labing una nilang pilde sulod sa upat ka duwa pinaagi sa impresibong 94-86 nga kadaugan.

Ang 2-1 nga Simple Likes mosuway karon pagtabla sa team standings sa 3-1 nga Angel Mary Pawnshop dihang ilang ikasangka ang Harold's Hotel apan tungod kay napilde man  sila sa Angel Mary, igo lang silang maghupot sa ikaduhang pwesto bisan pa og silay modaog sa maong sangka.

Nagtabla pa unta ang iskor sa 90-all sa kataposang kapin sa usa ka minuto ang nagibilin nga duwa apan gibahin nilang Dacayana ug Medalle ang kataposang nuybe puntos sa ilang team nga naglakip sa tulo ka free throws ug usa ka krusyal nga offensive rebound aron makigtabla sa record sa ilang biktima sa 2-1.

Si Lito Mirasol maoy nangu sa Simple Like sa iyang 32 puntos samtang may 21 puntos si Dacayana. Midugang pa gyud si Medalle og 17 puntos ug mitikdol si Victor Lastomen og 10 puntos.

Ang Pimentel Brokers gipangulohan ni Ranel Patalita kinsa mibahog og 30 puntos samtang miduhang og 20 puntos si Dexter Caballlero kinsa maoy mitabang sa Pimentel sa pagrally sa nahibiling pipila ka segundos.

Sa laing bahin, si Ryan Villaver maoy nangu sa D&L Sportswear sa iyang 21 puntos samtang midugang og 15 puntos si Dondon Cadungog ug miamot pa gyud silang Toper ug Porly Pacaña ug 12 og 11 puntos, matag usa.  

Ang Angel Mary Pawnshop gipangulohan ni McLain Alkuino sa iyang 13 puntos ug laing tulo ka teammates ang mi-iskor sab og double figures dihang nag-eskalera ang iskor nilang Lito Bermudez, Jayson Ramirez ug Reniel Mi sa ilang 12,11 ug 10 puntos, matag usa.

Puntos matag usa:

First Game:

Simple Likes (99)— Mirasol 32, Dacayana 21, Medalle 17, Lastomen 10, Baricuatro 9, Sabalande 2, Abella 2, Zapanta 2, Sarsaba 2, Canceko 2.

Pimentel Brokers (95) —   Patalita 30, Caballero 20, Laborte 13, Reyes 12, Malicay 9, Boysello 5, Aglipa 3.

Second Game:

D&L Sportswear (94)—   Villaver 21, Cadungog 15, T. Pacaña 12, P. Pacaña 11, Batuto 9, Trangia 8, Abella 8, Parba, Torres 2, Dacayana 2.

Angel Mary Pawnshop (86)— Alkuino 13, Bermudez 12, Ramirez 11, Lim 10, Rara 8, Jabonero 6, Sydiongco 5, Dumaguit 4, Cajucson 2. (BANAT PALARO)