Grand finals sa CEPCA chessfest himuon karon

CEBU, Philippines -  Ipahigayon na ang Grand Finals sa Cebu Executives and Professionals Chess Association (CEPCA) tournament karong  adlawa didto sa Lola Soling's Place sa Brgy. Casuntingan, dakbayan sa Mandaue.

 Sugdan ang duwa sa ala-1 sa hapon diin ang 12 ka mga mananaog sa monthly qualifying ang  magsangka alang sa dungog ug labaw sa tanan ilhon nga labing masidlakong CEPCA player sa tuig 2013.

 Lakip sa mopakita'g aksiyon sa finals mao sila si lawyer Jong Melendez, Percival Fiel, Rey Flores,  Freddie Casagan, Maggie Dionson, Manny Abucay, Francisco 'Jun' Kidlat Jr., Peterson Sia, Harrison Chua, Domy Pialan, NM Arnold Cadiz ug Jimmy Ty Jr.

 Aron mahimong mabulokon ang kalihukan sa Cepcans, ang grupo mopahigayon sab og non-qualifiers tournament.

 Aduna kini registration fee nga P500 libre na ang dinner atol sa get-together ug Christmas party.

 Ang mga duwa gidumala nilang CEPCA sports committee chairman Jun Olis ug FIDE Arbiter Marvin Y. Ruelan.

 Uban pang highlights sa maong kalihukan mao ang induction sa CEPCA officers alang sa 2014-2015 nga pangulohan sa ilang presidente Engr. Jerry Maratas.

 Sa edad nga 34-anyos, si Maratas maoy kinabataan nga  nahimong presidente sa 23 na ka tuig nga club.

 Usa ka civil ug structural engineer, si Maratas nanag-iya sa Jemar Engineering Services nga espesyalista sa civil ug structural designs sa medium ug high-rise buildings. Si Maratas usa sab ka faculty member sa Engineering Department sa University of San Carlos (USC).

 Mokompleto sa bag-ong hut-ong sa CEPCA officers mao sila si Marvyne Guardiana (VP- External), Dante Arguelles (VP- Internal), Jun Olis (Secretary), Jun Kidlat (Treasurer), Ruel Hortelano (Auditor) ug Mandy Baria ug Jojo Muralla (Board Members). Si Muralla maoy club's immediate past president. (BANAT NEWS)