CEBU, Philippines - Ang barangays Pulpogan ug Cansaga midaog batok sa tagsa-tagsa nilang kaatbang aron moabante sa semifinals sa Inter-Barangay division sa 3rd Mayor Teresa 'Nene' P. Alegado Fiesta Cup basketball tournament didto sa Consolacion Sports Complex.
Magkaluhang Moneva nga sila si Russel ug Rexon nagkumboya og 60 puntos aron pangulohan ang Pulpogan pagpukan sa Cabahangan sa overtime sa iskor nga 80-70, samtang ang Cansaga nga gipangulohan ni Randy Colonia mipalagpot sa Lamac sa iskor nga 57-52.
Sa SK division, gipatapsingan sa Tilhaong ang Cabahangan, 68-65 alang sa ilang kahigayonan nga moduwa sa kampiyonato.
Moabot ngadto sa 21 ka mga barangays ang misalmot sa usa ka buwan nga torneyo nga usa sa mga highlights sa pagsaulog sa kapistahan sa Consolacion pahinungod sa ilang mahal nga patron San Narciso karong Oktubre 29.
Ang tinuig nga liga gipaluyohan ni Consolacion Mayor Teresa P. Alegado, Vice Mayor Rey Damole ug mga sakop sa Sangguniang Bayan.
Ang working committee gilangkuban ni sports chairman Boy Tibon sa abag ni Ben Ermac, ABC President Mariloy P. Casul ug SK Federation President Vito Rolito Villo isip co-chairpersons.
Ang mga duwa gidumala ni league commissioner Paul Alelu Q. Flores, ang kanhi star player sa Far Eastern University (FEU) Tamarraws sa UAAP. (BANAT NEWS)