Magos midaog didto sa Japan

CEBU, Philippines - Milampos pagdaug didto sa Japan ang pambato sa Rex ‘Wakee’ Salud stable nga si Romnick Magos human niya gipaundang sa fifth round ang Hapon nga si Kohei Kubo didto sa Tokyo Japan.

Sa taho sa Philboxing.com, nakasugat og lisud nga away si Magos ilabi na nga natumba siya sa third round, apan mipakita sa iyang kaisug ang Cebuano human siya nakarekober ug mibawus pagkulata sa Hapon.

Mikusug ang momentum ni Magos ug pag-abot sa fifth round, nakapasulod siya og mga kusug nga kombinasyon ngadto ni Kubo kinsa wala na makaagwanta sa atake sa Pinoy boxer.

Sa maong kadaugan si Magos mipalambo sa iyang record ngadto sa 9-2, 5KOs, samtang si Kubo nakahiagum sa iyang ikaupat nga pilde sud sa iyang 20 ka away. (BANAT PALARO)