CEBU, Philippines - Nagdilaab na usab sa kainit ang pulso ni 3-point artist Ramon Fontanosa sa Lower Malibo nga milubong sa Nawanao Block 4, 64-52 sa 40-above division sa Barangay Subangdaku Palarong Pambarangay 2012 niadtong Martes sa gabii didto sa Wireless Plaza, Teleof basketball court sa maong mauswagon nga barangay sa Mandaue City.
Mitusak og upat ka triples alang sa iyang 31 puntos si Fontanosa aron pangulohan ang Lower Malibo nga kasamtangan nagbitbit og 3-0 nga baraha.
Unang miarangkada ang Nawanao Block 4 sa kombinasyon nilang Ruben Flores ug Rustico Tan ug maoy nakabentaha paghuman sa unang 10 minutos sa duwa. Apan ang Lower Malibo hinay-hinay nga mikitkit sa labaw hangtod nga nailog ang momentum sa duwa. Sukad niadto, kontrolado na sa Lower Malibo ang nahabiling tulo ka kuwarter sa duwa.
Si Fontanosa nakakuha sab og dakung suporta gikan ni Antonio Ontong, kinsa miiskor sab og double figures sa iyang 10 puntos.
Si Flores miburak og 14 puntos, samtang si Tan mibahog og 11 puntos alang sa Nabanao Block 4 nga wala pa gyud makatilaw og daog sa ilang tulo ka duwa.
Sa laing aksiyon, ang San Vicente mikulit sa ikaduha nilang daog human maka-eskapo sa Semense Compound sa iskor nga 58-54 sa seniors division ning ikaduhang tuig nga Palarong Pambarangay nga gitukod ni tournament chairman Brgy. Capt. Ernie N. Manatad uban sa abag ni Hon. Rene C. Tecson (co-chairman) ug Ramon C. Fontanosa (sports coordinator/secretariat). Ingon man sa mga reperi -- Mamay Puzon, Henry Fontanosa ug Arun Wenceslao ug sa table official nga si Carlou Amora.
Puntos Matag Usa
LOWER MALIBO (64) - Fontanosa 31, Ontong 10, Son 6, Pepito 6, Martel 5, Rosatasi 2
NAWANAO BLOCK 4 (52) - Flores 14, Tan 11, Castañeda 9, A. Dy 6, F. Hanzel 6, Ceniza 4, Santomi 2 (BANAT NEWS)