CEBU, Philippines - Miangkon ang Brazilian Jiu-Jitsu black belt ug Mixed Martial Arts (MMA) fighter nga si Rolles Gracie nga usa si Filipino boxing superstar Manny Pacquiao sa iyang mga idolo ug inspirasyon sa iyang karera isip fighter.
Si Rolles kinsa kabahin sa nabantog nga pamilya sa mga Gracie nga maoy nag-imbento sa Brazilian Jiu-Jitsu moduwa uban ang iyang duha ka igsuon nga sila si Igor ug Gregor sa ONE Fighting Championship 5: Pride of Nation karong Agosto 31 didto sa Smart Araneta Coliseum.
Si Rolles moaway ni Tony Bonello, samtang si Igor makigharung ni Jung Hwan Cha, samtang si Gregor makigharung ni Nicholas Mann sa Yaw-Yan Hybrid.
Gawas sa mga managsuong Gracie, laing atangan sa maong dakung MMA fight card ang duha ka Filipino MMA superstars nga sila si Eduard ‘Landslide’ Folayang ug Eric ‘The Natural’ Kelly.
Ang undefeated URCC champion nga si Folayang moaway ni Swiss Felipe Enomoto, samtang si Kelly makigsangka sa UFC legend nga si Jens Pulver. - BANAT NEWS