Keiz BJ Motors mopasiugda'g national motocross

CEBU, Philippines - Mga banggiitang riders lukop nasud ang magtigi sa 8th leg sa Keiz BJ Motocross and Phoenix Cyclomax Titan Motocross Series karong Domingo didto sa mas gipadak-an nga racetrack sa barangay Pagsabungan, dakbayan sa Mandaue.

Kini ang labing unang higayon nga mopasiugda og national motocross competition ang Keiz BJ Motors nga gipahaom alang sa ikapitong anibersaryo sa maong tindahan.

"Nindot ni nga kompetisyon tungod sa presensya sa mga top riders gikan sa lain-laing dapit sa nasud," matud pa ni Keiz BJ Motors big boss Siegfred Ornopia atol sa press conference kagahapon didto sa Lola Saling's Grill and Seafood Haus sa Brgy. Casuntingan sa Mandaue.

"Matambalan na usab ang kauhaw sa atong mga riders ug sa mga fans nga dugay-dugay na nga wa kakita og aksiyon sa motocross," dugang pa niya.

Kapin sa P100,000 nga ganting salapi ang giandam alang sa mga mananaog

Mga kategoriya nga tigian naglakip sa expert, intermediate, novice, executive A, B ug C, executive selection limited edition, mini 65cc, mini 85cc, peewee, beginners selection, beginners open production, local enduro, local Pagsabungan ug "habal-habal-wanggits" showdown.

Ang numero unong rider sa Pilipinas nga si Kenneth San Andres, kinsa karon ranks No. 3 sa Asian motocross circuit maoy mangulo sa mga dekalibreng riders sa premier expert division uban sa No. 1 rider sa Davao nga si Kimboy Pineda ug garbo sa Sugbu nga si Jon-Jon Adlawan.

 Gawas sa ganting salapi, ang riders makabaton sab og puntos nga ilang kinahanglanon alang sa individual ranking sa "Rider of the Year" award.

Gipasiugdahan usab sa Phoenix Petroleum Inc. pinaagi sa ilang Visayas sales representative Geoffrey Viñalon, ang usa ka adlaw nga lumba gisuportahan usab sa Norkis and Haojue Philippines pinaagi ni Edmund Pingkian, Motolite pinaagi ni Roy Cabaña, Engr. Jun Mahusay and family, RMO Motor Parts, WRW Enterprises, Betonval Ready Concrete ug Pagsabungan barangay council ubos sa liderato ni Brgy. Capt. Andres Suson ug Hon. Asterio 'Bubbles' Suson. (BANAT)