Cebu Cycling Challenge mosikad na

CEBU, Philippines - Maghugop na sab ang mga dekalibreng siklesta lukop nasud alang sa 2012 Cebu Cycling Challenge nga mosikad karong adlawa diha sa South Road Properties (SRP).

Ang lumba nga gipasiugdahan sa Guardians Delta Force International Inc. (GDFII) uban sa suporta sa Provincial Government, tipik lamang sa mga kalihukan sa kasaulogan sa 443rd Founding Anniversary sa probinsiya sa Sugbu.

Sa alas-8 sa buntag, himuon ang Individual Time Trial (ITT) stage nga maoy motimaan sa pagsugod sa lumba nga adunay gilay-on nga 40 kilometros.

Ang Stage 1 himuon karon gikan sa Cebu City paingon sa Bogo City nga adunay kinatibuk-ang 101.7 kilometros.

Ugma himuon ang stage 2 gikan sa Bogo paingon sa Toledo nga may gilay-on nga 86.9 kilometros, samtang ang stage 3 sa Sabado magsugod sa Toledo hangtod sa Argao nga adunay kinatibuk-ang 186.7 kilometros.

Tapuson ang usa ka semana nga kompetisyon pinaagi sa 60-kilometer criterium circuit race sa Cebu International Convention Center (CICC) sa Mandaue City.

 Mga koponan nga kompirmadong mosalmot mao ang Pangasinan Team, Butuan City Team, LBC A ug B, LPG American Vinyl, Danao Cyclist ug host Cebu Province.

Gawas sa mga pambato sa Sugbo nga sila si Niño Surban, Jaybop Pagnanawon ug Albert Basirgo, anaa usab ang mga international cyclist medalists gikan sa Luzon nga naglakip nila ni Arnel Quirimit ug Balir Ravena. (BANAT NEWS)