CEBU, Philippines - Mahimo na nga mapalit sugod karong adlawa ang mga tiket alang sa Pinoy Pride XV: Philippines vs. Mexico "The Rematch" sa Agosto 18 nga bidahan nilang Jason 'El Niño' Pagara ug Rosbel Montoya diha sa Waterfront Cebu City Hotel and Casino.
Hiniusang proyekto sa ALA Promotions ug sa ABS-CBN Sports, ang mga tiket mapalit sa SM City-Cebu ug sa SM-Consolacion, Waterfront Cebu City Hotel and Casino, Mooon Café-I.T. Park, USA Sports, Gaisano Fiesta Mall-Tabunok, ALA Boxing and Fitness Gym sa Banilad Town Centre. Mahimo sab nga motawag sa ALA Promotions head office sa numero 236-4611.
Sa maong boxing event, ang Filipino rising star nga si Pagara mosuway sa pagbawos sa Mehikanong si Montoya.
Gawas sa Pagara-Montoya showdown, laing ALA rising superstar nga si Genesis Servania ang makigbinakbakay batok ni Mexican Jorge Pazos alang sa WBO Asia Pacific super bantamweight title.
Mohimo usab sa iyang comeback fight si kanhi OPBF champion Jimrex Jaca diin iyang sukdon ang abilidad sa laing Mehikanong boksidor nga si Angel Martinez. - BANAT NEWS