CEBU, Philippines - Ang kampo ni IBF light flyweight champion Johnriel ‘Quadro Alas’ Casimero (16-2, 10KOs) nagtuo nga kinahanglan nga usa ka dominanteng kadaugan o knockout ang ilang mahimo aron mapilde ang Mexican nga si Pedro Guevara (18-0, 13KOs).
Si Casimero manalipod sa iyang bakus sa labing unang higayun ni Guevara karong Agosto 4 didto sa balwarte sa Mehikano sa Centro de Convenciones sa Mazatlan, Sinaloa, Mexico.
Ang trainer ni Casimero nga Christopher ‘Pingping’ Tepora nagkanayon nga kinahanglan nila nga makahimo og impresibong kadaugan batok ni Guevara aron malikayan nga mabiktima sa hometown decision.
“Kung di knockout, kinahanglan namo nga kulatahon pag maayo ang kontra,” matud pa ni Tepora kinsa molarga uban ni Casimero karong adlawa paingun sa Mexico.
Hinuon, si Tepora mipadayag sa iyang kompyansa ngadto sa iyang boksidor nga mulampos pagdepensa sa bakus batok sa way pildeng Mexican boxer. “Kaya ra kaayo ni Casimero, ang mga gipangpilde aning Guevara mga wa ilhing boxer.”
Ang lumad nga taga-Ormoc City nga si Casimero anaa na sa hustong kondisyon human sa iyang pipila ka buwan nga training didto sa Omega Boxing Gym. Nakahuman na usab siya og dul-an usa ka gatus ka sparring sessions. - BANAT NEWS