RoS itataya ang malinis na kartada
MANILA, Philippines – Isusugal ng Elasto Painters ang kanilang malinis na rekord, habang puntirya naman ng Gin Kings ang kanilang ikalawang sunod na panalo.
Magtatagpo ang nangungunang Rain or Shine at Barangay Ginebra ngayong alas-7:30 ng gabi matapos ang salpukan ng B-Meg at Meralco sa alas-5:15 ng hapon sa elimination round ng 2012 PBA Governor’s Cup sa Smart-Araneta Coliseum.
Sinikwat ng Elasto Painters ang kanilang pangatlong dikit na panalo matapos talunin ang Air21 Express, 106-92, noong Mayo 30, habang nanggaling naman ang Gin Kings sa malaking 100-73 paglampaso sa Bolts noong Hunyo 3 sa Cebu City.
Bitbit ng Rain or Shine ang 3-0 kartada kasunod ang Ginebra (2-1), nagdedepensang Petron Blaze (2-1), Powerade (2-1), B-Meg (2-1), Barako Bull (1-1), Alaska (1-2), Talk ‘N Text (1-3) at Meralco (1-3).
Humakot si import Jamelle Cornley ng 21 points at 14 rebounds para sa pangatlong sunod na panalo ng Rain or Shine.
“Our next game will be against Rain or Shine. They’re leading right now,” wika naman ni Gin Kings’ mentor Siot Tanquingcen. “We’ll see what we can do.”
Sa unang laro, hangad naman ng Llamados, nagkampeon sa nakaraang 2012 PBA Commissioner’s Cup, na masolo ang ikalawang posisyon sa pakikipagkita sa Bolts, natalo sa kanilang huling dalawang laro.
- Latest
- Trending