CEBU, Philippines - Mopahuway una og kapin tunga sa buwan si kanhi Pinay boxing champion Ana 'Hurricane' Julaton sa boksing human sa iyang kapildihan batok ni Argentinian Yesica Marcos niadtong Sabado didto sa Argentina.
Si Julaton pakyas pagdepensa sa iyang WBO super bantamweight title niadtong Sabado dihang napilde pinaagi sa 10-round "unanimous decision."
Tungod niini, ang Canadian promoter ni Julaton nga si Allan Tremblay nagkanayon nga mopahuway una'g kadiyot si Julaton sa boksing aron usab hinuktukan ang sunod nga lakang nga himuon niini sa iyang karera.
Wala usab gikompirmar ni Tremblay kun madayon ba ang Julaton-Marcos "rematch," apan iyang gisaad nga kun mahitabo kini, ilang paningkamoton nga adto kini awayon sa "neutral grounds."
Gawas sa pagkawagtang sa iyang bakus, nabugto sab ang upat ka sunod-sunod nga daog ni Julaton. Si Julaton adunay rekord nga 10-3-1, 1KO. (BANAT SPORTS)