100 cyclists mosalmot sa 2nd Padyak Pinoy

CEBU, Philippines - Kapin sa 100 ka seklista gikan sa Kabisay-an ang gipaabot nga mosalmot sa 2nd Sports Tourism- Padyak Pinoy Visayas qualifying race karong weekend nga manukad diha sa Cebu City Hall grounds.

Ang duha ka adlaw nga lumba adunay lima ka kategoriya, ang Elite A, Veterans B, Masters C, Golden D ug Executive E.

Ang Stage 1 sugdan ugma diin ang mga riders mosubay sa rota nga may gilay-on nga 60 kilometros gikan sa Cebu City paingon sa Toledo City.

Sa Stage 2 karong Domingo, ang mga riders motaak og 20 kilometros gikan sa Toledo City ngadto sa Aloguinsan ug balik.

Tungod kay usa kini ka qualifying race alang sa LeTour de Filipinas sa Abril 14 didto sa Cagayan Valley, gipaabot nga   modagsa ang mga elite cyclists nga magtigi sa Elite A category.

Nag-una sa lista mao ang SEA Games gold medalist nga si John Rene Mier uban nila ni Jaybop Pagnanawon, Marvin Tampic, Elmer Navarro, Albert Basergo ug top junior cyclist Niño Surban.

Gawas sa mga Cebuano cyclists, mga out-of-town riders gikan sa Bacolod City ug Tacloban City ang moapil sa kompetisyon.

Ganting salapi ug tropeyo ang giandam alang sa top performers sa matag kategoriya.

Ang registration fee nagkantidad og P75.00 Mahimong magparehistro sa gitukod nilang booth sa Mandaue Reclamation, South Road Properties ug Toledo City Sports Commission.

Sa dugang pangutana, mahimong motawag sa numero nga 4145368 o 09162208996. (BANAT SPORTS)