CEBU, Philippines - Laing eksplosibong Mixed Martial Arts fight card ang moulbo human gilusad sa Backfist Promotion ang ikatulong edisyon sa "Fight Ground Championships" nga gikatakda sa Pebrero 18 didto sa Days Hotel sa Brgy. Ibabao, Mandaue City.
Sa press conference kagahapon didto sa Chillout Restobar, si Joseph Lanoza, presidente sa Backfist Promotion miingon nga kini pa lang ang sinugdanan sa mga serye sa MMA tournament nga ilang ipahigayon karong tuiga.
"Himuon ta ni nga quarterly aron usab dili mablanko ang atong mga fighters ug aron dili mausik ilang training, ato silang paduwaon pirme," matud pa ni Lanoza.
Human sa iyang impresibong kadaugan sa Fight Ground 2 dihang iyang gipilde ang mas inilog nga si Mark 'Terminator' Araneta, ang kanhi boksidor nga si Romelo 'Arcom' Espra mobalik og saka sa ring aron modepensa sa iyang featherweight title batok ni Aldy Zosa sa Bulley Muay Thai stable.
Moaway sa supporting bout ang beteranong si Johnjier 'Dangerous' Torbiso batok ni Analito Siloy, samtang ang Sugbuanong Muay Thai champion nga si Gino Po mohimo sa iyang MMA debut batok sa wala pa mailhing kontra.
Si Backfist Promotion commissioner ug kanhi MMA fighter Ali 'The Grappler' Malawi namahayag nga wala pa nila mapinalisar ang fight card, apan gipahibalo nga adunay 12 ka paresan nga moaway ubos sa MMA category.
"Amo ning gituyo nga MMA lang ug wala nay kickboxing event para di maglibug ang mga tawo ilabi na sa katong mga dili pa kaayo educated bahin sa MMA," matud pa niya. (BANAT SPORTS)