Mga masaarong boksidor nidaog

CEBU, Philippines - Mga maanindot kaayong sangka sa mga amateur boxers ang nasaksihan sa miaging adlaw atol sa gipahigayong Summit Natural Drinking Water Amateur Fight Night Series didto sa Gaisano Countrymall carpark.

Bayente-kuwatro ka   boksidor gikan sa nagkalain-laing dapit ang nagsambunot lakip ang usa ka Japanese fighter, kinsa mipakita sa iyang katakus sa publiko sa maong boxing extravaganza nga libre sa tanan.

 Usa sa labing nindot nga sangka mao ang kang Rey Morales sa Bacolod City nga nidaog batok ni Eleno Traya sa Cabancalan, Mandaue City.

Ang Japanese fighter nga si Ezidi Kazuma midaog sab batok ni Tony Jumao-as sa Marion Alihis Sanao Boxing Club pinaagi sa puntos.  

Midaog sab pinaagi sa puntos si Reymond Esgana sa Phil-Aust Boxing Blub batok kang John Paul Tanodra sa Mabolo Elementary School ubos sa 26 kg. class.

Lain pang midaog mao sila si Ighan Loveno sa Cabancalan Elementary School batok sa iyang teammate Jobel Reyes sa 32 kgs division, si Warren Gabumpa sa Pit-os National High School midaog sa puntos batok ni Bryan Remedio sa University of the Visayas ubos sa 48 kgs..

Midaog sab sa puntos si Ferde San Roque sa Cabancalan National High School batok sa iyang teammate Jiboy Mayang   sa 48 kgs. division, si Christian Bacolod sa Mabolo National High School midaog   batok kang Richard Barrios sa Bais City ubos sa 50 kgs., si JK Malupay sa Cabancalan midaog batok kang Raul Yu sa Talamban ubos sa 52 kgs., si Chellwellan Cantel sa Cabancalan National High School midaog batok ni Jason Formentera sa Camotes Island ubos sa 53 kgs.

Ang bisitang si Juren Labordo sa  Bacolod City midaog   batok ni Richie Montealto sa Consolacion sa 53 kgs. ug si Mardy Muana sa Cabancalan National High School midaog pinaagi sa RSC (referee stopped contest) sa third round batok ni Virden Rivera sa Antique.  (BANAT SPORTS)