CEBU, Philippines - Mihimo og dakung imprisyon si Loveleinell Casidsid dihang misakiyo kini og duha ka titulo ug usa ka runner-up atol sa first leg sa Summit Triathlon Championship Series niadtong weekend didto sa Flushing Meadows Resort and Playground sa Dauis, Panglao Island, Bohol.
Si Casidsid sa Team Summit nidominar sa women's open sa oceanman competition ug triathlon team event.
Mipahiluna sab siya sa ikatulo sa female open triathlon.
Sa triathlon, si Casidsid mitapos luyo ni Aimee Dequina sa PBC, apan ang iyang labok igo na kaayo aron makatampo sa kalampusan sa iyang team sa team event. Si Casidsid mao ang bugtong babaye nga sakop sa Team Summit nga gilangkuban nilang Jose Merdino Lim, Kristian Cabahug ug Joseph Larida.
Sa pagka karon, ang Team Summit adunay 54 puntos, gisundan sa Tribo uban sa ilang 38 puntos ug Nfyeat nga mitigom og 33 puntos.
Gibutyag sab sa organizers ang individual winners sa triathlon event diin ang top Filipino finisher atol sa 2011 Kona Ironman nga si Noy Jopson maoy naghari sa male open batok ni Franklin Peñalosa Makati.
Si Paul Jumamil nidaog sa men's 19-under, si Rosalito Albina sa men's 20-29, si Jose Medrino Lim sa men's 30-39, si Adolfo Miñoza sa men's 40-49 ug si Simon Arizola sa men's 50-above. (BANAT SPORTS)