CEBU, Philippines - Plansado na ang tanan alang sa 2nd Mayor Apura Invitational Motocross Cup karong Nobiyembre 13 didto sa barangay Liburon racetrack sa Carcar City.
Ang usa ka adlaw nga torneyo giisip nga labing daku karong tuiga tungod sa pagsalmot sa unom ka European riders. Anaa usab ang mga elite riders sa nasud sama ni multi-titled Glenn Aguilar ug SEL-J Sports Racing Team nga gilangkuban sa mga riders gikan sa Nueva Ecija, Tuguegarao ug Palawan. Ang Team Pacquiao mipadayag usab sa ilang interes mosalmot sa usa ka adlaw nga kompetisyon.
Dili hinuon mabitin ang mga Sugbuanong riders nga gipangulohan ni teen sensation Jon-Jon Adlawan, managsuong Jubenile ug Jovannie Abellar ug Aldwin Canlas.
"This is exciting because this is the first not only in Carcar but in Cebu that there will be an international invitational motocross race," matud pa ni Carcar Mayor Nicepuro Apura atol sa press conference kagahapon didto sa Baseline Restaurant.
Gawas sa expert class, laing kategoriya nga tigian mao ang intermediate, novice, beginners, 125 enduro, veterans A, B ug C, underbone (habal-habal) class, peewee ug mini. (BANAT SPORTS)