CEBU, Philippines - Usa sa mga premyadong public secondary school sa nasud, ang Abellana National School (ANS) mopahigayon sa labing una nilang running event nga giulohan og "Abellana National School Run To Reconnect and Reunite" sa Nobiyembre 13 diha sa ANS campus sa Osmeña Boulevard.
Sikat nga tunghaan nga gigikanan sa mga malampuson ug prominenteng personalidad sa Sugbu, si ANS Alumni Federation president Daisy Toledo nagkanayon nga ang lumba magsilbe nga paagi aron mausa ang mga alumni sa tunghaan ug ingon man pagtabang sa komunidad.
"Aside from our goal to reconnect and reunite our alumni, we also organized this activity for the beautification project for the City of Cebu," matud pa ni Toledo atol sa press conference kagahapon didto sa ANS Alumni Office.
Ang proceeds sa maong lumba ihatag ngadto sa kagamhanan sa siyudad sa Sugbu alang sa ilang sidewalk beautification projects nga padayon pang gitrabaho.
Si ANS Alumni Federation Founder ug Cordova Mayor Adelino Sitoy mipahibalo nga si kanhi Chief Justice Hilario Davide Sr. kinsa gikan sab sa Abellana, motambong sa maong kalihukan diin siya maoy mopabuto sa starting gun.
Ang lumba gibahin sa tulo ka kategoriya -- 10K, 5K ug 3K.
Mga ganting salapi ug medalya ang ihatag ngadto sa top finishers sa matag dibisyon
Cash prize ug medals ang nagpaabot alang sa top three finishers sa matag kategoriya, samtang special prizes ang madawat sa top alumni ug student finishers.
Ang registration fee nagkantidad og P250 ug P75 alang sa mga tinun-an. Mahimong magparehistro diha sa ANS Alumni office ug sa RUNNR sa Active Zone sa Ayala Center-Cebu. (BANATSPORTS)