CEBU, Philippines Nangandam na ang Department of Education (DepEd)-7 sa tinuig nga Central Visayas Regional Athletics Association (CVIRAA) Meet nga gikan sa Nobiyembre 27 hangtod sa Disyembre 2 didto sa Carlos P. Garcia Sports Complex sa Tagbilaran City.
Atol sa usa ka press conference didto sa Cebu City Vice Mayor’s Office conference room kagahapon, si DepEd-7 regional director Recaredo Borgonia midetalye nga tagsa-tagsa na nilang giduol ang nagkadaiyang school divisions sa Central Visayas aron malikayan ang gubot sa pagpili og mga atleta alang sa Palarong Pambansa.
Masaligon usab si Borgonia nga mahimong hapsay ang CVIRAA ning tuiga tungod sa dakung suporta nga ilang madawat sa kagamhanan sa siyudad sa Sugbu.
Sa iyang bahin, si Cebu City Vice Mayor Joy Augustus Young miingon nga sayo nilang plansahon ang schedules sa kalihukan agi'g preparasyon sa CVIRAA bisan pa og matunong kini sa CESAFI.
"I stand by my decision. We don’t need CESAFI. We need the schools. It’s up to them if they join or not," matud pa ni Young.
Gitahasan usab sa DepEd-7 ang mga magtutudlo nga mag-train og sayo sa officiating ug coaching sa nagkalain-laing sports events. (BANATSPORTS)