Kontrang Bautista mo abot karon

CEBU, Philippines -  Ang Mexican featherweight boxer nga si Heriberto “Cuate” Ruiz uban sa iyang trainer gikatakdang moabot karong gabii didto sa Mactan Cebu International Airport alang sa ilang rematch batok ni ALA fighter Rey “Boom Boom” Bautista.

Mutugpa ang eroplanong gisakyan ni Ruiz karong gabii, diin uban niya ang iyang trainer nga si Jose Heriberto Ruiz ug handler nga si Francisco Dominguez.

Si Ruiz ug Bautista magsangka sa main event sa Pinoy Pride 6: “Grudge Rematch” karong Hunyo 11 didto sa Waterfront Cebu City Hotel and Casino.

Usa sa labing giatangang rematch sa kasaysayan sa Philippine boxing ang sangka ni Bautista ug Ruiz, diin ang Mehikano midaog niadtong sa una nilang sangka niadtong tuig 2008 pinaagi sa unanimous decision didto sa Las Vegas .

Apan, mas nakadugang og kolor sa maong sangka mao ang labing uwahing pamahayag ni Ruiz nga subling pildehon si Bautista, ning higayuna atubangan sa liboan niini ka mga kababayan.

Gawas ni Ruiz, moabot usab karong adlawa ang Mehikanong si Juan Carlos Gallegos kinsa maoy atubangon ni WBO Youth AsPac light welterweight champion Jason Pagara.

Samtang ang undefeated Indonesian nga si Benja Loemoli nga maoy sangkaon ni kanhi WBC silver world champion Edrin Dapudong moabot ugmang adlawa. (BANAT NEWS)