CEBU, Philippines - Agi’g paghandom sa mitaliwan nilang presidente nga si Manuel 'Maning' Ting, ang Parklane International Hotel mopahigayon og lumba nga giuloha'g "Hunat Sugbu - Dagan Para ni Maning" karong Mayo 15 diha sa Ayala Center Cebu Terraces.
Ang lumba adunay duha ka kategoriya -- 15K ug 5K.
Bisan og usa lang kini ka memorial run, ang mga organizers misaad nga mohatag og ganting salapi, medalya ug gift certificates ngadto sa mga top finishers sa matag dibisyon.
Ang kampiyon sa 15K makadawat og P7,000, samtang ang 5K mobulsa og P3,000.
"Since this run is in honor of our beloved late president, Manuel 'Maning' Ting, we are planning to make it an annual memorial run until justice is served," matud ni running event chairman Stephen James Taylaran.
Sa registration fee nga P250, ang mga partisipante makadawat na og libreng running shirt ug snacks. Ang registration areas nahimutang sa RUNNR sa Ayala, Casa Ilongga sa Robinsons ug sa Cebu City Sports Center.
Ang deadline sa registration kutob lang sa Mayo 9. (BANATSPORTS)